Բաժանորդագրվեք araratnews-ի տելեգրամ ալիքին։
Վերջին օրերին հայաստանյան լրատվամիջոցներն ու սոցիալական մեդիան ակտիվորեն քննարկում են Հայոց ցեղասպանության հուշահամալիրի վերանորոգման աշխատանքները։
Ինչպես հաղորդում է Fip.am-ը «Karen Mkhitaryan» անունով ֆեյսբուքյան օգտատերերից մեկը անդրադառնալով թեմային տարածել է մի լուսանկար, որում Հուշահամալիրի Հավերժության տաճարի թեք մույթերը ջարդված են, երեսպատման սալիկները թափված հատակին։
Լուսանկարը մեծ տարածում է ստացել Facebook-ում։
Օգտատերը նաև, ի թիվս բազմաթիվ այլ օգտատերերի շահարկումների, կասկած է հայտնել, որ այն իրականում քանդվում է, և ոչ թե վերանորոգվում։
«Փաստերի ստուգման հարթակը» պարզել է, որ լուսանկարը գեներացված է արհեստական բանականության (ԱԲ/AI) միջոցով, այսինքն՝ կեղծ է։
Նախ քարերի կույտն իր գույնով և ստվերով չի ներդաշնակվում ընդհանուր միջավայրի հետ։ Բացի այդ, հուշարձանի մակերեսին առկա ճաքերը բնական չեն երևում․ նման թերություններ հաճախ հանդիպում են ԱԲ-ով կամ ֆոտոմոնտաժով ստացված պատկերներում, երբ պատկերի տարբեր հատվածները սահուն կերպով չեն միացվում։
Այսպես, ԱԲ-ով գեներացված լուսանկարները վերլուծող հարթակներից Sight Engine-ը լուսանկարի կեղծ լինելու հավանականությունը 99% է գնահատել։
Սրան զուգահեռ, կարևոր է նշել նաև, որ մի շարք ճարտարապետներ, ակտիվիստներ ու ցեղասպանագետներ (1, 2, 3, 4) բավարարված չեն Հուշահամալիրում ընթացող շինարարական աշխատանքների նորմերով և համարում են, որ դրանք ընթանում են ոչ պատշաճ ու անորակ ձևով։
Նշենք, որ Ծիծեռնակաբերդի հուշահամալիրի վերանորոգման աշխատանքներին օրերս ծանոթացել է ՀՀ կրթության, գիտության, մշակույթի ու սպորտի նախարար Ժաննա Անդրեասյանը. պաշտոնական հաղորդագրության մեջ նշվում է, որ Անդրեասյանը կարևորել է շինաշխատանքների բարձր որակն ու սահմանված ժամկետները՝ ընդգծելով հաջորդ ապրիլի 24-ին՝ զոհերի հիշատակը ոգեկոչող այցելուների հոսքի խոչընդոտումը բացառելու կարևորությունը։