Բաժանորդագրվեք araratnews-ի տելեգրամ ալիքին։
Մեր կարողությունների շրջանակում մենք ամենայն թափով սպասարկել ենք Ղարաբաղից տեղահանված բնակչության քաղաքացիության դիմումները: Այդ մասին ասուլիսի ժամանակ ասաց ՆԳ նախարարի տեղակալի պաշտոնակատար Արմեն Ղազարյանը:
«Մինչև այս պահն արդեն իսկ ունենք 40 հազարից ավելի տեղահանված անձինք, որոնք ձեռք են բերել ՀՀ քաղաքացիություն: Նրանցից ավելի քան 12 հազարը անչափահասներ են»,- ասաց նա:
Անդրադառնալով ԼՂ-ից տեղահանվածներին ՀՀ քաղաքացիություն տրամադրելու գործընթացի դանդաղեցման մասին քննադատություններին՝ Արմեն Ղազարյանը նկատեց՝ դա նոնսենս է:
ՆԳ նախարարի տեղակալի պաշտոնակատարը նաև տեղեկացրեց, որ բնակարանային ծրագիրը նպաստել է ՀՀ քաղաքացիություն ստանալու համար դիմելիության աճին: Դիմումների թիվն ավելի մեծ է, քան ձեռքբերումների թիվը:
ՆԳՆ միգրացիայի և քաղաքացիության ծառայության պետի պաշտոնակատար Նելլի Դավթյանը տեղեկացրեց, որ ԼՂ-ից տեղահանվածների համար ՀՀ քաղաքացություն ստանալու կարգը նաև թվայնացվել է, ինչը հեշտացրել է գործընթացը, ապա ներկայացրեց ՀՀ քաղաքացիության շնորհումները կոնկրետ թվերով:
«Այս պահին ունենք Ղարաբաղից տեղահանված անձանց շնորհված 27948 ՀՀ քաղաքացիություն, որից 8676-ն այս տարվա ցուցանիշն է»,- ասաց նա: