Բաժանորդագրվեք araratnews-ի տելեգրամ ալիքին։
«Բերքահավաքի լիալուսին»․ այս երեկո հայացք նետեք երկնքին։ Այս մասին գրել է «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը։
«Այսօր՝ սեպտեմբերի 26-ին, Երևանի ժամանակով ժամը 20։49-ին, կդիտվի «Բերքահավաքի լիալուսինը»։ Այսպես են անվանում Հյուսիսային կիսագնդում աշնանային գիշերահավասարին ամենամոտ լիալուսինը։ Այն կարելի է դիտել նաև նշված ժամից առաջ և հետո․ անզեն աչքով լուսնային սկավառակը գրեթե ամբողջական կթվա մի քանի երեկո շարունակ։
Անվանումը կապված է հին ժամանակներում բերքահավաքի հետ։ Տարվա այս շրջանում Լուսնի ծագման ժամն օրեցօր համեմատաբար քիչ է ուշանում, և մի քանի երեկո շարունակ լուսնի լույսը մայրամուտից հետո լուսավորում է դաշտերը։ Մինչև էլեկտրական լուսավորության տարածումը դա հողագործներին հնարավորություն էր տալիս աշխատանքը շարունակել նաև մթնշաղից հետո։
Հորիզոնին մոտ Լուսինը կարող է թվալ հատկապես մեծ ու ոսկեգույն կամ նարնջագույն։ Գունային երանգը պայմանավորված է մթնոլորտով․ ցածր դիրքում Լուսնի լույսն ավելի երկար ճանապարհ է անցնում օդի միջով, կապույտ ճառագայթներն ավելի ուժեղ են ցրվում, իսկ կարմրավուն երանգներն ավելի նկատելի են դառնում։ Մեծ թվացող չափը հիմնականում մեր տեսողական ընկալման առանձնահատկությունն է։
Այս երեկո Լուսնի հարևանությամբ կերևա նաև Սատուրնը՝ պայծառ լուսակետի տեսքով։ Մոլորակը կարելի է նկատել անզեն աչքով, իսկ նրա օղակները դիտելու համար անհրաժեշտ է աստղադիտակ։
Դիտելու համար մայրամուտից հետո ընտրեք դեպի արևելք բաց տեսարան ունեցող վայր։ Պարզ երկնքի դեպքում լիալուսինն ու Սատուրնը գեղեցիկ զույգ կկազմեն աշնանային գիշերային երկնքում»,-գրել է նա։