Բաժանորդագրվեք araratnews-ի  տելեգրամ ալիքին։

Ազգային ժողովի «Քաղաքացիական պայմանագիր» խմբակցության պատգամավոր Վաղարշակ Հակոբյանը Ֆեյսբուքի իր էջում հայտարարություն է տարածել․

Սիրելի՛ հայրենակիցներ,

Վերջին հինգ տարիների ընթացքում Ծաղկաձոր խոշորացված համայնքում իրականացվել են մի շարք կարևոր և լայնածավալ ծրագրեր՝ ուղղված մեր քաղաքի և գյուղական բնակավայրերի զարգացմանը, ենթակառուցվածքների բարելավմանը և բնակիչների կյանքի որակի բարձրացմանը։

Ճանապարհներ, ջրամատակարարման և կոյուղու համակարգեր, արտաքին լուսավորություն, մայթեր, հանրային տարածքներ․ այս ամենը համայնքի կայուն զարգացման կարևորագույն հիմքերն են։ Խոսելով առաջընթացի մասին՝ պետք է գնահատենք ոչ միայն իրականացված ծրագրերը, այլև դրանց հետևում կանգնած հետևողական աշխատանքը, պատասխանատվությունն ու նվիրումը։

Ծաղկաձոր համայնքում իրականացված կարևոր ծրագրերից ցանկանում եմ առանձնացնել հետևյալները՝

• Ծաղկաձոր քաղաքի Պահլավունյաց փողոցի կապիտալ վերանորոգման, ասֆալտապատման և մայթերի կառուցման աշխատանքներ։
• Մհեր Մկրտչյան և Չարենցի փողոցների հենապատերի վերակառուցման աշխատանքներ։
• Օլիմպիական, Վ. Հարությունյան, Մ. Մկրտչյան, Ե. Չարենցի, Կեչառեցի և Ավ. Իսահակյան փողոցներում, ինչպես նաև Ավ. Իսահակյան փակուղու՝ Ծաղկունյաց հրապարակից մինչև Մ. Մկրտչյան փողոց ընկած հատվածում, բնական բազալտե քարով մայթերի կառուցման աշխատանքներ։
• Ծաղկաձոր համայնքի կոյուղու համակարգի կառուցման աշխատանքներ։
• Համայնքի արտաքին լուսավորության համակարգի արդիականացման աշխատանքներ։
• Մեղրաձոր գյուղի 3-րդ, 9-րդ և 11-րդ փողոցների կապիտալ վերանորոգման և ասֆալտապատման աշխատանքներ։
• Մեղրաձոր բնակավայրի 2-րդ, 3-րդ, 6-րդ, 7-րդ, 8-րդ փողոցների շարունակական հատվածների և 10-րդ փողոցի կապիտալ վերանորոգման ու ասֆալտապատման աշխատանքներ։
• Աղավնաձոր բնակավայրի 4-րդ փողոցի և դրա 1-ին նրբանցքի կապիտալ վերանորոգման ու ասֆալտապատման աշխատանքներ։
• Մարմարիկ բնակավայրի 2-րդ, 3-րդ փողոցների 2-րդ նրբանցքի, 5-րդ և 6-րդ փողոցների կապիտալ վերանորոգման, ասֆալտապատման և ջրահեռացման համակարգի կառուցման աշխատանքներ։
• Մարմարիկ բնակավայրի խմելու ջրի ջրամատակարարման համակարգի կառուցման աշխատանքներ։
• Արտավազ բնակավայրի ջրամատակարարման համակարգի վերակառուցման աշխատանքներ։
• Արտավազ-Փյունիկ բնակավայրի ջրամատակարարման համակարգի կառուցման աշխատանքներ։
• Հանքավան բնակավայրի 3-րդ փողոցի 1-ին և 3-րդ նրբանցքների կապիտալ վերանորոգման, ասֆալտապատման և ջրահեռացման համակարգի կառուցման աշխատանքներ։

Այս ծրագրերի աշխարհագրությունն ինքնին կարևոր հանգամանք է․ աշխատանքներն ընդգրկել են ոչ միայն Ծաղկաձոր քաղաքը, այլև Մեղրաձոր, Աղավնաձոր, Մարմարիկ, Արտավազ, Փյունիկ, Հանքավան և համայնքի մյուս բնակավայրերը։ Համայնքի համաչափ զարգացումը ենթադրում է, որ դրական փոփոխությունները պետք է հասնեն յուրաքանչյուր բնակավայր՝ բարելավելով մարդկանց առօրյան և ստեղծելով ավելի հարմարավետ պայմաններ։

Այս առիթով ցանկանում եմ առանձնահատուկ շնորհակալություն հայտնել Ծաղկաձոր համայնքի ղեկավար Նարեկ Հարությունյանին, նրա տեղակալներ Ոսկան Եղիազարյանին և Գարիկ Գևորգյանին՝ համայնքի զարգացմանն ուղղված հետևողական աշխատանքի, ստանձնած պատասխանատվության և իրականացված ծրագրերում ունեցած ներդրման համար։

Համայնքի ղեկավարումը հեշտ աշխատանք չէ։ Այն պահանջում է ամենօրյա հետևողականություն, բնակիչների խնդիրները լսելու և դրանց լուծումներ գտնելու պատրաստակամություն, արդյունավետ կազմակերպված աշխատանք և պատասխանատվություն համայնքի յուրաքանչյուր բնակչի առաջ։ Արդյունքները ձևավորվում են թիմային աշխատանքի, համագործակցության և ընդհանուր նպատակի շուրջ համախմբվելու շնորհիվ։

Իմ խորին շնորհակալությունն եմ հայտնում նաև Ծաղկաձոր խոշորացված համայնքի «Քաղաքացիական պայմանագիր» կուսակցության թիմին և բոլոր համակիրներին, ովքեր այսօր էլ, ինչպես 2021 թվականին, նույն պատրաստակամությամբ ու վճռականությամբ կանգնած են Նարեկ Հարությունյանի և նրա գլխավորած թիմի կողքին։ Ձեր հետևողականությունը, նվիրվածությունն ու համայնքի ապագայի հանդեպ պատասխանատվությունը կարևոր հիմք են հետագա աշխատանքի և նոր հաջողությունների համար։

Սիրելի՛ հայրենակիցներ, եկե՛ք գնահատենք կատարված աշխատանքը, միևնույն ժամանակ լինենք պահանջատեր չլուծված խնդիրների հարցում և շարունակենք հետևողականորեն աշխատել մեր համայնքի ապագայի համար։ Ծաղկաձորը պետք է շարունակի զարգանալ՝ դառնալով ավելի բարեկարգ, հարմարավետ և ժամանակակից համայնք, որտեղ յուրաքանչյուր բնակավայր և յուրաքանչյուր բնակիչ կզգա այդ զարգացման արդյունքները։

Հոկտեմբերի 25-ին Հայաստանում տեղի են ունենալու տեղական ինքնակառավարման մարմինների ընտրություններ։ Այս կարևոր փուլում կոչ եմ անում բոլորիդ՝ գիտակցելով ձեր ձայնի նշանակությունն ու պատասխանատվությունը մեր համայնքի ապագայի համար, անպայման մասնակցել ընտրություններին և կատարել ձեր ընտրությունը։

Ես կոչ եմ անում ամենայն պատասխանատվությամբ մոտենալ այս ընտրություններին և քվեարկել «Քաղաքացիական պայմանագիր» կուսակցության օգտին՝ Նարեկ Հարությունյանի գլխավորությամբ, որպեսզի շարունակենք արդեն սկսված աշխատանքները, պահպանենք զարգացման ընթացքն ու միասին կյանքի կոչենք համայնքի հետագա զարգացման ծրագրերը։

Մաղթում եմ հաջողություն առաջիկա ընտրություններում Նարեկ Հարությունյանին, նրա գլխավորած թիմին և բոլոր նրանց, ովքեր իրենց աշխատանքով ու նվիրումով նպաստում են Ծաղկաձոր համայնքի առաջընթացին։

Մեր համայնքի ապագան կառուցվում է պատասխանատու աշխատանքի, շարունակական զարգացման, համախմբվածության և բնակիչների շահերին ծառայող որոշումների միջոցով։ Եկե՛ք միասին շարունակենք այս ճանապարհը՝ հանուն մեր համայնքի և մեր բնակիչների բարեկեցության։