Ապրիլի 28-ին Գեղարքունիքի մարզպետ Գնել Սանոսյանն ընդունեց «Գյումրու Երիտասարդական նախաձեռնությունների կենտրոն» հասարակական կազմակերպության նախագահ Արթուր Նաջարյանին, ՄԱԿ-ի մանկական հիմնադրամի երեխայի պաշտպանության ծրագրի ղեկավար Հայկ Խեմչյանին, աշխատակիցների: Հանդիպման սկզբում հյուրերը խոսեցին այցի նպատակների մասին, համաձայն որի, նախատեսել են «Երիտասարդների տուն» բաց երիտասարդական կենտրոնի մոդելի հիման վրա Գավառ քաղաքում հիմնել
«Գավառի երիտասարդների տուն» ՝ Գեղարքունիքի մարզպետարանի և Գավառի համայնքապետարանի աջակցությամբ: Գավառ քաղաքում նման կենտրոն հիմնելու նպատակով աշխատանքային խումբը հանդիպում էր ունեցել նաև Գավառի քաղաքապետարանում, որտեղ քննարկվել էր կենտրոնի տարածքի ընտրության հետ կապված հարցը:


Ըստ Արթուր Նաջարյանի՝ «Երիտասարդների տուն» բաց երիտասարդական կենտրոնը բաց երիտասարդական աշխատանքի մեթոդաբանությամբ և սկզբունքներով աշխատող կառույց է: ՄԱԿ-ի «ճգնաժամային օգնության կենտրոն» հիմնադրամի ֆինասական աջակցությամբ նման կենտրոններ այս պահին գործում են Գյումրիում և Սպիտակում:


Ինչպես նշվեց նկարագրության մեջ՝ «Երիտասարդների տուն» բաց երիտասարդական կենտրոնի նպատակն է բարձրացնել երիտասարդների քաղաքացիական ակտիվությունն ու բարեկեցությունը՝ պրոֆեսիոնալ երիտասարդական աշխատանքի իրականացման և հասանելի երիտասարդական ծառայությունների տրամադրման միջոցով: Կենտրոնի գործունեության ուղղություններն են՝ կրթությունը, զբաղվածությունը, ժամանցի կազմակերպումը, առողջ ապրելակերպի խթանումը և մասնագիտական կողմնորոշումը:


«Կենտրոնի գործունեությունը նպատակաուղղված է երիտասարդների կյանքի որակի բարելավմանը, նրանց քաղաքացիական ակտիվության բարձրացմանն ու համայնքային կյանքին ներգրավմանը: Կենտրոնը 13-18 տարեկան պատանիների և երիտասարդների համար կրթվելու, նոր հմտություններ զարգացնելու, ինքնաարտահայտվելու, ազատ ժամանակը կազմակերպելու և հասակակիցների հետ շփվելու ապահով տարածք է, ինչպես նաև նպաստող միջավայր՝ նրանց սոցիալականացմանը և համայնքներում դրական փոփոխությունների իրականացմանը: Կենտրոնի կողմից մատուցվող ծառայություններն անվճար են »,- նշեց Արթուր Նաջարյանը:


Գեղարքունիքի մարզպետ Գնել Սանոսյանը ողջունեց հյուրերին ցուցաբերվող նախաձեռնության համար, նշելով, որ Գեղարքունիքի մարզի երիտասարդները իրոք նման կենտրոն հաճախելու կարիք ունեն:


«Ես համոզված եմ, որ այս նախաձեռնությունը կտա իր տեսանելի և շոշափելի արդյունքը Գավառ քաղաքի երիտասարդների շրջանում և կարծում եմ, որ հստակ ժամկետներում մենք համատեղ աշխատանքի արդյունքում կհասնենք այն նպատակին, ինչին որ ձգտում ենք: Ես կարևորում եմ նման երիտասարդական կենտրոնների դերը մեր մարզի բոլոր քաղաքային, ինչպես նաև գյուղական բնակավայրերում, քանզի մեր երիտասարդների համար չկան բավարար պայմաններ իրենց ազատ ժամանակը և ժամանցը կազմակերպելու համար: Մենք ամբողջովին տրամադրված ենք, որպեսզի մարզում ստեղծվի այդ կենտրոնը և մեր լիազորությունների շրջանակներում պատրաստակամ ենք աջակցել ձեզ, որպեսզի սեղմ ժամկետներում հիմնվի այդ կենտրոնը և ծառայի մեր երիտասարդների կրթվածության ու զարգացվածության խորացմանը» :


Զրույցի ընթացքում պայմանավորվածություն ձեռք բերվեց՝ առաջիկայում կազմակերպել ևս մեկ հանդիպում , որի ընթացքում Գեղարքունիքի մարզպետարանի և Գավառի քաղաքապետարանի ներկայացուցիչների հետ կդիտարկվի կենտրոնի համար ընտրված տարածքի բարեկարգման հետ կապված խնդիրները:

 

313