Գեղարքունիքի մարզպետը դիտարկեց Ծովակ-Ախպրաձոր ճանապարհի հիմնանորոգման աշխատանքների ընթացքը

Մայիսի 4-ին Գեղարքունիքի մարզպետ Գնել Սանոսյանը Վարդենիսի տարածաշրջան կատարած աշխատանքային այցի ընթացքում դիտարկեց Ծովակ-Ախպրաձոր միջհամայնքային նշանակության 14,4 կիլոմետր ճանապարհի հիմնանորոգման աշխատանքների ընթացքը:

Ծրագրի շինարարական աշխատանքները մեկնարկել են 2020 թվականին:

Համաշխարհային բանկի ֆինանսավորմամբ իրականացվող ճանապարհաշինական ծրագրի պայմանագրային արժեքը կազմում է 1,4 միլիարդ դրամ, որի շրջանակներում կասֆալտապատվի նշված ճանապարհի 11,4 կիլոմետր հատվածը, իսկ մնացած 3 կիլոմետրի ասֆալտապատումը կիրականացվի այլ ծրագրերով:

Շինարարական աշխատանքներն իրականացվում է «Կապավոր» ՍՊԸ-ի կողմից: Այս պահին կատարվում են հողային աշխատանքներ, տեղադրվում է հիմքի ավազային շերտը:

«Ի ուրախություն մեզ և նշված համայնքների բնակիչների, վերջապես կհիմնանորոգվի Ծովակ-Ախպրաձոր ռազմավարական կարևոր նշանակության այս ճանապարհը, որը սպասարկում է Ծովակ, Լճավան, Մաքենիս և Ախպրաձոր համայնքներին: Ճանապարհի հիմնանորոգմամբ այս բնակավայրերում առաջընթաց կգրանցվի և՛ գյուղատնտեսության և՛ զբոսաշրջության ոլորտներում»,-նշեց մարզպետ Գնել Սանոսյանը:

Բացի հիմնական ճանապարհի ասֆալտապատումից, ծրագրի շրջանակներում կառուցվելու են նաև մայթեր, տեղադրվելու է ջրահեռացման համակարգ, հիմնանորոգվելու են դեպի դպրոց, մանկապարտեզ և կենսական նշանակության այլ կառույցներ տանող փողոցները:

Համաձայն պայմանագրի՝ Ծովակ-Ախպրաձոր ճանապարհի հիմնանորոգման աշխատանքները նախատեսված է ավարտին հասցնել 2021 թվականի նոյեմբեր ամսին:

 

06 Մայիս, 2021 14:46
140
; ;