Երևանի քաղաքապետ Հայկ Մարությանն իր ֆեյսբուքյան էջում տեսանյութ է հրապարակել ու կից գրել.

Սիրելի երևանցիներ,

Այսօրվանից 13 նոր կոմպակտ ավտոբուսով սկսել է գործել 74 համարի երթուղին՝ արդեն չորրորդը նոր շարժակազմով։

Երթուղին անցնելու է Դավթաշենի 4-րդ թաղամասից՝ Հալաբյան փողոցով, Արշակունյաց պողոտայով, վերջնակետը՝ Էրեբունու զանգված (երթուղու մանրամասն նկարագրությունը՝ հետևյալ հղմամբ https://www.yerevan.am/am/route-network/

Երթուղին կաշխատի առավոտյան 07.30-ից մինչև 23.00։

Կրկին հիշեցնում եմ, որ

Պետք է վճարել նստելիս։ Մետաղադրամ ընդունող սարքը «վերցնում է» միայն 100 դրամանոցներ։ Եթե չունեք 100 դրամանոց, վարորդը սկզբնական շրջանում կարող է մանրել, բայց խիստ ցանկալի է ունենալ 100-դրամանոցը։ Շուտով կունենանք նաև էլեկտրոնային վճարման համակարգ:

Ավտոբուսի սրահը տեսահսկվում է՝ ուղևորների և ընդհանրապես, երթևեկության անվտանգության նկատառումներից ելնելով։

Վարորդները հատուկ համազգեստով են, հատուկ հրահանգավորված են երթևեկության ընթացքում չծխելու և հեռախոսով չխոսելու պահանջի մասին։

Հաջորդիվ նախատեսվում է շահագործել 47 և 24 համարների երթուղիները։

06 Մայիս, 2021 17:51
178
; ;