Երևանի քաղաքապետարանի ենթակայությամբ գործող՝ Ազատության հրապարակի ստորգետնյա ավտոկայանատեղին ամբողջությամբ արդիականացվել է: Ներդրվել են մուտքի և ելքի ավտոմատ կառավարման, վճարման և տեսահսկման համակարգեր: «Արմենպրես»-ին այս մասին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից։

«Նախկինում ավտոկայանատեղ մուտք գործելիս անհրաժեշտ էր սեղմել կոճակը և վերցնել կտրոնը, որտեղ գրանցված էր մուտքի ժամը և ելք կատարելիս պետք էր ներկայացնել կտրոնը, որտեղ ժամն էր նշված, հենց դրա հիման վրա էլ կատարվում էր հաշվարկ և տեղում միայն կանխիկ վճարում էր իրականացվում»,- նշում է «Երևան քաղաքի կառավարման տեխնոլոգիաների կենտրոն» ՓԲԸ տնօրեն Սարգիս Մանուկյանը:

Ըստ աղբյուրի՝ այժմ տեղադրված հատուկ տեսախցիկը պատկերի վերլուծությամբ գրանցում է պետհամարանիշը և արձանագրում մուտքի ժամը: Համակարգը սկսում է հաշվարկել մեքենայի համար վճարվելիք գումարը, և անցարգելն ինքնաշխատ բացվում է: Վարորդներն այսուհետ կայանելու համար պետք է վճարեն ինքնասպասարկման տերմինալներով: Ավտոկայանատեղի երեք հարկերում տեղադրված վեց տերմինալները վճարային տարբեր եղանակների հնարավորություն ունեն:

«Կարող են վճարումը կատարել թե կանխիկ, որի ժամանակ նաև մանրադրամն է վերադարձվում, հնարավոր է վճարել բանկային քարտով, ինչպես նաև NFC համակարգով՝ բջջային հեռախոսով»,- ասում է Սարգիս Մանուկյանը:

«Այստեղ երևում է այս երկու օրերի ընթացքում մեքենաների շարժը, և կարող ենք փաստել, որ արդեն իսկ տերմինալներով վճարել են մեր վարորդների 50 տոկոսից ավելին»,- նկատում է ընդհանուր աշխատանքների կազմակերպման ծառայության պետ Արտյոմ Գալստյանը:

Երևանի քաղաքապետարանից հայտնում են,. որ շուրջ 500 մեքենայի համար նախատեսված համայնքային ավտոկայանատեղում գործում են տարբեր սակագներ, նաև ամսական բաժանորդագրության հնարավորություն կա:

«Առավոտյան 9-ից մինչև 24:00-ը մեկ ժամի արժեքը 200 դրամ է, 24:00-ից մինչև առավոտյան 9:00-ը մեկ ժամի արժեքը՝ 100 դրամ, սակայն, եթե ամբողջ գիշեր է մեքենան կայանում, ապա՝ 500 դրամ: Գոյություն ունի նաև ամսական բաժանորդագրություն, որի արժեքը 20 հազար դրամ է: Ի դեպ, համեմատականով եթե նայենք, կենտրոնի այլ ստորգետնյա ավտոկայանատեղերի համեմատ շատ մատչելի է. մյուս տեղերում մոտ երկու անգամ ավելի թանկ է»,- նշում է սպասարկող ընկերության աշխատակից Սարգիս Աբրահամյանը:

«Հաշվետվողականությունն է մեծացել, արդեն հստակ է, թափանցիկ, որևէ շեղում հնարավոր չէ: Այստեղ մեկ կարևոր հանգամանք էլ կա. եթե նախկինում ունեինք միջնորդ սպասարկող՝ վճարահաշվարկային ընկերություն, որն այստեղից հավաքում էր դրամը և մուտք անում գանձապետական հաշվին, այժմ այդ միջնորդը բացառվել է, սյսինքն՝ թերմինալում վճարված գումարները միանգամից մուտք են արվում գանձապետական հաշվին: Մեկ օղակի պակասելն արագացրել է նաև համայնքային բյուջեի գումարների մուտքը»,- ասում է Սարգիս Մանուկյանը:

Քաղաքապետարանի տեղեկացմամբ՝ Ազատության հրապարակի ստորգետնյա ավտոկայանատեղում, ի դեպ, նաև էլեկտրական ավտոմեքենաների համար լիցքավորման կայաններ են տեղադրվել, որոնք հնարավորություն են տալիս կայանելուն զուգընթաց ավտոմեքենան անվճար լիցքավորել: Կայանները տեղադրվել են «Էներգետիկայի հայկական գործակալություն» հիմնադրամի կողմից իրականացվող Plug.am ծրագրով։ Երևանում էլեկտրական ավտոմեքենա ձեռք բերելու ցանկության խթանումը տարբեր նախաձեռնություններով կրելու է շարունակական բնույթ:

 

285