ՀՀ ԱԺ տնտեսական հարցերի մշտական հանձնաժողովի հոկտեմբերի 20-ի նիստում քննարկվել է Կառավարության հեղինակած ««Մաքսային գործերում համագործակցության եւ փոխօգնության մասին» 1994 թվականի ապրիլի 15-ի համաձայնագրում փոփոխություններ կատարելու մասին» արձանագրությունը վավերացնելու մասին» հարցը:

Ըստ հիմնական զեկուցող, ՀՀ պետական եկամուտների կոմիտեի նախագահի տեղակալ Աշոտ Մուրադյանի՝ արձանագրությունը ստորագրվել է 2018-ին Դուշանբեում՝ նպատակ ունենալով բարձրացնել մաքսային ծառայությունների միջեւ փոխգործակցության արդյունավետությունը եւ կանոնակարգել միջազգային համագործակցության տեղեկատվական ու մեթոդական բազան:

Զեկուցողի խոսքով՝ համաձայնագրի նպատակն է մաքսային գործի ոլորտում համաձայնագրի մասնակից պետությունների մաքսային մարմինների համագործակցության միջոցով նպաստել ուղեւորային եւ բեռնային հաղորդակցության զարգացմանն ու արագացմանը:

Փաստաթղթի շրջանակում համագործակցությունն ու փոխօգնությունը կիրականացվի կատարելագործելու կողմերի մաքսային սահմանով ապրանքների եւ տրանսպորտային միջոցների տեղափոխման հետ կապված մաքսային հարաբերությունների կարգավորման կարգը, ապահովելու մաքսային օրենսդրության պահպանումը, կանխարգելելու, հայտնաբերելու, կանխելու եւ հետաքննելու մաքսային իրավախախտումները, մաքսային գործի բնագավառում տարբեր ուղղություններով իրականացնելու փորձի փոխանակում:

Աշոտ Մուրադյանի տեղեկացմամբ՝ արձանագրությամբ հաստատվող փաստաթղթում ավելացվել են հոդվածներ, որոնք կարգավորում են կողմերի մաքսային մարմինների միջեւ հարցումների կազմակերպմանն առնչվող հարցերը:

Արձանագրությունը մեր երկրի կողմից ստորագրվել է վերապահումներով, ըստ որի՝ հայկական կողմի պարտավորությունները եւ իրավունքները չեն տարածվի Ադրբեջանի նկատմամբ:

Նախաձեռնությունն արժանացել է հանձնաժողովի հավանությանը:

568