ԱԺ «Հայաստան» խմբակցության պատգամավոր Աննա Գրիգորյանն այսօր հետաքրքրվեց Նիկոլ Փաշինյանից՝ Սյունիքում զորքերի հետքաշման հրամանը եղել է բանավո՞ր, թե՞ գրավոր․ «Ի՞նչ է այն մարդու անուն-ազգանունը, որ հնչեցրել է նման հրաման, արդյոք ԱԽ նիստ է տեղի ունեցել նման որոշում կայացնելուց առաջ»։

Վարչապետ Նիկոլ Փաշինյանն էլ հարցին հարցով պատասխանեց. «Սյունիքի հետ կապված՝ ես երբևէ հրաժարվե՞լ եմ, որ ես այդ որոշման պատասխանատուն եմ, գրավոր է եղել, թե բանավոր է եղել, ընթացակարգերով են տալիս հրամաննները: Քննարկում եղե՞լ է, այո, եղել է, ԱԽ նիստ չի եղել, բայց խորհրդի բոլոր անդամները, Սյունիքի մարզպետը, Արտաքին գործերի նախարարը, որ ասում էր տեղյակ չեն, նախարարի տեղակալը մասնակցել են այդ քննարկմանը, քննարկումը տեղի է ունեցել կառավարությունում։ Այդ որոշումը կայացրել ենք պատերազմից խուսափելու համար»:

Նա նշեց, թե որոշումը կայացվել է նաև այն տրամաբանությամբ, որ բանակցային քննարկումների ընթացքում եղել է ըմբռնում, որ յոթ շրջանը, այո, պետք է հանձնել:

«Եռակողմ ֆորմատով թուղթ չի ստորագրվել, ինչո՞ւ ենք մենք ինֆորմացիաները կիաստ-պռատ ասում. Հայաստանի շահերից ելնելով: Մենք գաղտնիք չունենք», – ասաց ՀՀ վարչապետը:

Նրա խոսքով՝ զորքերի հետքաշման հրամանը տվել է ինքը, իրականացրել է Պաշտպանության նախկին նախարար Վաղարշակ Հարությունյանը:

«Այդ որոշումը կայացվել է ստրատեգիական նշանակության ճանապարհն առնվազն ինչ-որ ժամանակ չկորցնելու նկատառումով», – նշեց վարչապետը:

Փաշինյանի խոսքով՝ Սյունիքի հարցով միանձնյա պատասխանատուն ինքն է:

«Հինգ-վեց անգամ քննարկում է եղել, բանակցութուն է եղել, մեկնում է եղել, պայմանավորվածություն է եղել, գրավոր պայմանավորվածություն է եղել: Պետք է կողմնորոշվենք՝ Հայաստանը ո՞րն է», -ասաց նա:

Փաշինյանն ընդդիմությանը կոչ արեց հայտարարել, որ իրենք իշխանության գալու պարագայում Հայաստանի ստորագրությունը հանելու են նոյեմբերի 9-ի հայտարարության տակից:

Վերջում Փաշինյանը հավալեց՝ շատ գոհ է մոսկովյան բանակցություններից:

Iravanban.net

458