Երևանում «Մոսկվայի տուն» կենտրոնում կայացել է շախմատի բլից մրցաշար՝ նվիրված կանանց միամսյակին։ Մրցաշարին մասնակցում էին Հայաստանում գործող ռուսական կազմակերպությունների և Բելառուսի, Թուրքմենստանի, Ղազախստանի ու Ռուսաստանի դեսպանատների ներկայացուցիչներ։ 

«Մոսկվայի տուն» կենտրոնից հայտնում են, որ մրցաշարի 18 մասնակիցների մեջ էին նաև Երևանում նշյալ կենտրոնի գլխավոր տնօրեն Վահրամ Կարապետյանն ու Հայաստանում Բելառուսի արտակարգ և լիազոր դեսպան Ալեքսանդր Կոնյուկը, որոնք էլ համապատասխանաբար զբաղեցրել են առաջին և երրորդ տեղերը։ 2-րդ տեղը զբաղեցրել է ռուսական սահմանապահ զորքերի ներկայացուցիչ Սամվել Մուրդայանը։ Առաջին 3 մրցանակային տեղերը զբաղեցնող մասնակիցները պարգևատրվել են մեդալներով և դիպլոմներով, մյուս բոլոր խաղացողներին շնորհվել են հավաստագրեր։ 

«Նման մրցաշարը նպաստում և ամրապնդում է գործընկերային հարաբերությունները Հայաստանում գործող ռուսական կազմակերպությունների և դեսպանատների միջև։ Մասնակիցների կազմում թեև մեկ կին մասնակից ունեինք՝ Թուրքմենստանի դեսպանատան ներկայացուցիչը, բայց այսօրվա մրցաշարն ու հաղթանակները նվիրում ենք մեր սիրելի կանանց»,- նշել է Երևանում «Մոսկվայի տուն» կենտրոնի գլխավոր տնօրեն Վահրամ Կարապետյանը։

«Հիացած եմ հայկական շախմատով, ես պրոֆեսիոնալ չեմ, բայց մեծ սիրահար եմ։ Տղամարդու համար շախմատ խաղալը պարտադիր պայման է։ Շախմատային տախտակի մոտ մոռանում եմ ամեն բան։ Ինձ մոտ այս մրցաշարը կարոտի զգացողություն առաջացրեց, շատ էի խաղում երիտասարդ տարիներին: Հիանալի նախաձեռնություն էր, իմ հաղթանակն էլ մեծ շնորհակալություն է կանանց՝ իրենց անփոխարինելի դերի համար»,- նշել է Հայաստանում Բելառուսի արտակարգ և լիազոր դեսպան Ալեքսանդր Կոնյուկը։ 

Երևանում «Մոսկվայի տուն» կենտրոնը մրցաշարն իրականացնում է Հայաստանում շախմատի ակադեմիայի հետ համատեղ։

«Նման միջոցառումները շատ ցանկալի են։ Հնարավորություն  ստեղծվեց խաղալու, մտածելու և մրցելու լավ միջավայրում։ Նման մրցաշարերը նպաստում են նաև շախմատի հանրայնացմանը»,- նշել է Հայաստանի Շախմատի ակադեմիայի հիմնադիր նախագահ Սմբատ Լպուտյանը։

Մրցաշարն անցկացվել է շրջանաձև կարգով՝ ՖԻԴԵ-ի շախմատի կանոններին համապատասխան, յուրաքանչյուր խաղի համար տրվել է 5 րոպե ժամանակ։ Բլից մրցաշարը սպասարկում էր միջազգային կարգի մրցավար Վահագն Խաչատրյանը։

552