Եվրոպայի ամառային երրորդ խաղերի մասնակիցների ցանկը հաստատում է աշխարհամասի օլիմպիական կոմիտեն: Այս մասին հայտնում է ՀԱՕԿ-ը։
ԵՕԿ –ը արդեն պաշտոնապես ամրագրել է մեր երկրի առայժմ հինգ մարզիկ – մարզուհիների անունները:
Լեհաստանի Կրակովում հունիսի 21–ին մեկնարկելիք երրորդ մարզահանդեսին մասնակցելու իրավունքը Հայաստանից առաջինը նվաճել է երևանցի հրաձգուհի Էլմիրա Կարապետյանը:
Շնորհալի ատրճանակավարուհին Տալլինում, մարտին անցկացված Եվրոպայի առաջնությունում, օդամղիչ զենքով, 10 մետրից կատարած 60 կրակոցով վաստակել է 577 միավոր, 59 մասնակիցների պայքարում գրավել է երրորդ տեղը, արժանացել բրոնզե մեդալի և Կրակովի ստուգատեսին մասնակցելու ուղեգրի:
Հաջորդը նույնպես մարզուհի է. Անիտա Մակյանը: Նա կարատեի կումիտե մրցաձևի ներկայացուցիչ է: 68 կգ քաշային կարգում երևանցին դարձել է համաշխարհային ուսանողական խաղերի փոխչեմպիոն: Մարզվում է հարազատ եղբոր՝ Դավիթի ղեկավարությամբ և նրա ուղեկցությամբ վարկանշային միավորներ է վաստակել նաև Իսպանիայի Գվադալահարա քաղաքում անցկացված Եվրոպայի առաջնությունում:
Կանանց եռյակում հերթական ներկայացուցիչը Քրիստինե Մանգասարյանն է: Եվրոպական խաղերում նա հանդես կգա թեքբոլ մարզաձևում: Կմասնակցի անհատական և խառը զուգախաղերում, որտեղ կընկերակցի Ռաֆայել Վարդանյանին: Տղամարդկանց զուգախաղերում ներկայացված կլինի Ռաֆայել Վարդանյան- Գոռ Սարգսյան երկյակը: Վերջինը, ի դեպ, իր ունակությունները կդրսևորի նաև մենախաղերում:
Թեքբոլի մեր եռյակը վարկանշային միավորներ է վաստակել Սկոպյեի, Մադրիդի և Պոդգորիցայի միջազգային մրցաշարերում:
Եվրոպայի ամառային երրորդ խաղերի մասնակիցների շարքը աստիճանաբար խտանում է: