ՌԴ ԱԳ նախարար Սերգեյ Լավրովը Известия-ին տված հարցազրույցում նշել է, որ Հայաստանի ղեկավարությունը, ծանոթ լինելով Մոսկվայի տեսակետին, գիտակցում է Ռուսաստանի Դաշնության պատրաստակամությունը՝ Ադրբեջանի հետ հարաբերությունների կարգավորմանը նպաստելուն, ինչպես նաև տեղյակ է Արևմուտքի քայլերի մասին, որոնք բարդացնում են այդ կարգավորումը։
«Մենք ազնվորեն հայտնել ենք մեր բոլոր գնահատականները Հայաստանի ղեկավարությանը, նրանք լավ գիտեն, որ մենք հավատարիմ ենք մնում մեր պարտավորություններին և պատրաստ ենք շարունակել նպաստել Ադրբեջանի հետ իրենց հարաբերությունների կարգավորմանը և այս գործընթացը լիարժեք ավարտին հասցնել»,- նշել է նա։
ՌԴ արտգործնախարարը մեղադրել է Եվրամիությունը ու ՆԱՏՕ-ին Երևանի և Բաքվի միջև հարաբերությունների վերականգնման գործընթացը բարդացնելու համար։
Լավրովը նշել է, որ վերջին շրջանում Հայաստանի իշխանությունները կապի մեջ չեն լինում ռուսական կողմի հետ, և ինքը վերջին անգամ Հայաստանի արտգործնախարար Արարատ Միրզոյանի հետ հանդիպել է 2023 թվականի նոյեմբերին։