Հայաստանի 200 դպրոցներում բնական գիտությունների և տեղեկատվական տեխնոլոգիաների լաբորատորիաներ կբացվեն։ Այս և այլ աշխատանքներ նախատեսված են Համաշխարհային բանկի «Կրթության բարելավման լրացուցիչ ֆինանսավորում» վարկային ծրագրով։
Ծրագիրը մեկնարկել է 2015 թվականին և կառուցվել կամ հիմնանորոգվել է 136 մանկապարտեզ և 13 դպրոց։ 107 դպրոցներում ստեղծվել են գիտական լաբորատորիաներ, 585 դպրոց համալրվել է համակարգիչներով, այդ թվում՝ հեռավար ուսուցման համար։
Նոր ծրագրով 80 բնակավայրերում կստեղծվեն 3000 երեխայի համար նախատեսված մանկապարտեզներ, կհիմնանորոգվեն 4 ճեմարան, բացի այդ 200 դպրոցներում կբացվեն քիմիայի, ֆիզիկայի, կենսաբանության, աշխարհագրության, տեղեկատվական տեխնոլոգիաների լաբորատորիաներ։
Ծրագրի ծավալը կկազմի 28,25 մլն եվրո, որից 22,6 մլն-ը վարկ կտրամադրի Համաշխարհային բանկը, իսկ 5,65 մլն-ը՝ Հայաստանի բյուջեն։