Բաժանորդագրվեք araratnews-ի տելեգրամ ալիքին։
Հունիսի 20-ին Կամբոջայի մայրաքաղաք Պնոմպենում դեսպան Սուրեն Բաղդասարյանը հանդիպել է Կամբոջայի արտաքին գործերի և միջազգային համագործակցության նախարարության պետքարտուղարի տեղակալ Ֆեն Սավնիի հետ։ Այս մասին տեղեկացնում է Վիետնամում ՀՀ դեսպանությունը:
Զրույցի ընթացքում դեսպան Բաղդասարյանը նշել է Կամբոջայի հետ քաղաքական երկխոսության, իրավապայմանագրային դաշտի ընդլայնման և երկու երկրներ մուտքի արտոնագրերի փոխադարձ վերացման անհրաժեշտության մասին։
Անդրադառնալով միջխորհրդարանական համագործակցությանը՝ ՀՀ դեսպանը նշել է, որ այն կարող է խթանել երկխոսությունը նաև ԱՍԵԱՆ-ի Խորհրդարանական վեհաժողովի շրջանակներում։
Դեսպան Բաղդասարյանը հավելել է, որ Հայաստանը պատրաստ է Կամբոջայի հետ կիսվել իր փորձով նորարարությունների, բարձր տեխնոլոգիաների և թվային փոխակերպման ոլորտներում։
Պետքարտուղարի տեղակալ Ֆեն Սավնին իր զրուցակցի ուշադրությունը հրավիրել է վերջին շրջանում Կամբոջայում զբոսաշրջության և ավիափոխադրումների ոլորտների արագ զարգացման վրա՝ ընդգծելով այդ միտումների հնարավոր դրական ազդեցությունը Հայաստանի հետ երկկողմ զբոսաշրջային հոսքերի ակտիվացման հարցում։
Ֆեն Սավնին կարևորել է ներդրումային միջավայրի բարելավման ուղղությամբ Կամբոջայի կառավարության իրականացրած քայլերը՝ հրավիրելով հայ գործարարներին այցելել Կամբոջա՝ գործնական կապեր հաստատելու նպատակով։
Կողմերը վերահաստատել են իրենց պատրաստակամությունը՝ շարունակելու փոխաջակցությունը միջազգային կազմակերպություններում։