Բաժանորդագրվեք araratnews-ի տելեգրամ ալիքին։
ԵՄ Խորհուրդն այսօր համաձայնություն է ձեռք բերել հայկական արտադրանքի նկատմամբ առևտրի ազատականացման ժամանակավոր միջոցներ սահմանելու վերաբերյալ՝ Հայաստանի տնտեսությանն աջակցելու նպատակով։
Այս միջոցները կազատականացնեն դեպի ԵՄ հայկական արտահանման շուրջ 80%-ը։
Այս արտոնյալ պայմանավորվածությունն ուղեկցվում է որոշակի պայմաններով և ներառում է նաև պաշտպանական միջոցներ ԵՄ շուկայի համար, եթե ներմուծումը բացասաբար անդրադառնա ԵՄ արտադրողների վրա։
Խորհուրդը հավանություն է տվել Հանձնաժողովի առաջարկին առանց փոփոխությունների՝ ճանապարհ հարթելով կանոնակարգի արագ ընդունման համար այն բանից հետո, երբ Եվրոպական խորհրդարանը նույնպես, ինչպես սպասվում է, կհաստատի առաջարկն առանց փոփոխությունների։
Այս մասին նշված է Խորհրդի պաշտոնական կայքում։
Իր հերթին, Իռլանդիայի արտաքին գործերի և առևտրի նախարար Հելեն ՄաքԷնթին հայտնել է, որ Եվրոպան կանգնած է Հայաստանի և նրա ժողովրդի կողքին, ովքեր ընտրել են բարեփոխումների և Եվրոպական միության հետ ավելի սերտ համագործակցության հստակ ուղի։
Կանոնակարգը նախատեսում է հայկական ապրանքների լայն տեսականու համար ներմուծման մաքսատուրքերի ժամանակավոր կասեցում, ներառյալ ընտրված գյուղատնտեսական ապրանքները, որոնք ենթակա են սակագնային քվոտաների: Միջոցները կկիրառվեն կանոնակարգի ուժի մեջ մտնելուց հետո երկու տարի ժամկետով։
Արտոնյալ պայմանավորվածությունները կգործեն պայմանով, որ Հայաստանը պահպանի ապրանքների ծագման կիրառելի կանոնները, վարչական համագործակցություն ծավալի ԵՄ-ի հետ, զերծ մնա ԵՄ ներմուծման վրա նոր առևտրային սահմանափակումներ մտցնելուց և հարգի CEPA-ի հիմնական տարրերը, ներառյալ ժողովրդավարական սկզբունքները, օրենքի գերակայությունը և մարդու իրավունքները: