Սեպտեմբերի 22-ին կայանալիք ՏԻՄ ընտրություններին Գյումրիում կպայքարի 10 քաղաքական ուժ` 7 կուսակցություն և 3 դաշինք: Ընտրությունները կանցկացվեն համամասնական ընտրակարգով:

Araratnews.am-ը ներկայացնում է մասնակցության հայտ ներկայացրած ուժերի, ինչպես նաև ցուցակների առաջին համարների անունները: 

Եվ այսպես` «Քաղաքացիական պայմանագիր» կուսակցությունը կգլխավորի Շիրակի մարզպետ Հովհաննես Հարությունյանը: 

«Զարթոնք» ազգային-քրիստոնեական կուսակցության առաջին համարը Վարդևան Հակոբյանն է:

Հայաստանի հանրապետական կուսակցությունը Գյումրու քաղաքապետի թեկնածու է առաջադրել Արտյոմ Ղուկասյանին:

«Ապրելու երկիր» կուսակցությունը կգլխավորի Կարեն Մալխասյանը:

 

«Արժանապատիվ ուղի» կուսակցության առաջին համարը նախկին ՕԵԿ-ական Հովհաննես Մարգարյանն է:

 «Բալասանյան դաշինք» սոցիալական կուսակցությունը, որը ընտրություններին մասնակցության հայտ ներկայացրած ամենաշատ թեկնածուներն ունի, քաղաքապետի թեկնածու է առաջադրել  Վարդգես Սամսոնյանին:

Հայաստանի կոմունիստական կուսակցությունը նույնպես կմասնակցի Գյումրու ՏԻՄ ընտրություններին: Կուսակցության ցուցակը կգլխավորի Կոնստանտին Ղավազյանը:

 

Դաշինքներից Գյումրու ՏԻՄ ընտրություններին մասնակցության հայտ է ներկայացրել «Գյումրին կռնա» դաշինքը, որը կգլխավորի Վարդան Սրտաշյանը:

«Թասիբով» դաշինքը  կգլխավորի Կարապետ Պողոսյանը, որը ՀՀ մարդու իրավունքների պաշտպանի՝ Շիրակի տարածքային գրասենյակի նախկին համակարգողն էր:

«Հայրաքաղաք» դաշինքի քաղաքապետի թեկնածուն Գյումրու ավագանու անդամ, անկուսակցական, Ժուռնալիստների «Ասպարեզ» ակումբ ՀԿ հիմնադիր Լևոն Բարսեղյանն է։

Դե ինչ` սեպտեմբերի 22-ին պարզ կդառնա` ով կդառնա Գյումրու նոր քաղաքապետը և որ կուսակցությունը կամ դաշինքը կձևավորի ավագանի, որպեսզի լուծի քաղաքի առաջ ծառացած խնդիրները:

 

 

288