Շիրակի մարզում կորոնավիրուսային հիվանդության որոշակի ակտիվություն է նկատվում։ Տևական ժամանակ գրանցված զրո ցուցանիշի փոխարեն ներկայում օրական մինչև 10 դեպք է արձանագրվում 20-22 նմուշառման արդյունքում։

«Հայկական ժամանակ»-ի հետ զրույցում Շիրակի մարզպետարանի առողջապահության և սոցիալական ապահովության վարչության պետի պարտականությունները կատարող Լեյլի Ասլանյանը տեղեկացնում է, որ այս պահին ստացիոնար պայմաններում բուժվողներ չկան, տրիաժում ևս չունեն քովիդի կասկածով քաղաքացիներ։

Տնային հսկողություն է սահմանված 38 կորոնավիրուսակրի նկատմամբ։ Ասլանյանի խոսքով՝ երկար ժամանակ Շիրակում անգամ նման հսկողության տակ գտնվողներ չկային։

Այս ամենին զուգահեռ, ըստ պատասխանատուի, պատվաստումային գործընթացն է բավականին նվազել:

Առաջին դեղաչափով պատվաստված է մարզի պատվաստումային տարիքի բնակչության 45,2 տոկոսը։ Պատվաստանյութի երկրորդ չափաբաժինը ստացել է քաղաքացիների շուրջ 41 տոկոսը։

Երրորդ՝ բուստեր պատվաստանյութը, նախընտրել է շիրակցիների ընդամենը 2,4 տոկոսը։

Թե ինչո՞ւ մարդիկ այլևս չեն պատվաստվում, Ասլանյանը 2 պատճառ է առանձնացնում. «Ժողովուրդը չի ուզում, չեն պատվաստվում։ Պրոցեսն ակտիվ չէ, դեպքեր չկան, եզակի են: Սրան էլ զուգահեռ սահմանափակումները հանվեցին, մարդիկ էլ չեն զգուշանում»: