Լեռնային Ղարաբաղը Հայաստանի հետ կապող միակ ճանապարհը արգելափակվել է 2022 թվականի դեկտեմբերի 12-ից՝ խաթարելով այնտեղ բնակվող տասնյակ հազարավոր էթնիկ հայերի համար առաջին անհրաժեշտության ապրանքների և ծառայությունների հասանելիությունը, հայտնում է Human Rights Watch-ը։
Արգելափակված ճանապարհը նաև թույլ չի տալիս Լեռնային Ղարաբաղի բնակիչներին դուրս գալ կամ մտնել, քանի որ ավելի քան հազար մարդ, ըստ տեղեկությունների, արգելափակված է այս կամ այն կողմից և չեն կարողանում հասնել իրենց տները: Նրանց թվում կան տասնյակ երեխաներ, որոնք դպրոցական էքսկուրսիայի են գնացել Հայաստանի մայրաքաղաք Երևան և այժմ չեն կարողանում վերադառնալ իրենց ծնողների մոտ։
«Լեռնային Ղարաբաղն արտաքին աշխարհին կապող միակ ճանապարհի երկարատև արգելափակումը կարող է հանգեցնել մարդասիրական սարսափելի հետևանքների»,- ասում է Human Rights Watch-ի Եվրոպայի և Կենտրոնական Ասիայի տնօրեն Հյու Ուիլյամսոնը:
«Անկախ նրանից, թե ով է փակում ճանապարհը, Ադրբեջանի իշխանությունները և այնտեղ տեղակայված ռուսական խաղաղապահ ուժերը պետք է ապահովեն բաց մուտքը, տեղաշարժի ազատությունը և հիմնական ապրանքների և ծառայությունների հասանելիությունը։ Որքան երկարատև լինեն հիմնական ապրանքների և ծառայությունների մատակարարման խափանումները, այնքան մեծ կլինի քաղաքացիական բնակչության համար վտանգը»,- ասել է Ուիլյամսոնը: