Բաժանորդագրվեք araratnews-ի տելեգրամ ալիքին։
Եվրախորհրդարանը հայտարարել է, որ Թուրքիայի ԵՄ անդամակցության գործընթացը չի կարող վերսկսվել թուրքական կառավարության ժողովրդավարական նահանջի պատճառով։
Այս մասին ասվում է չորեքշաբթի օրը՝ մայիսի 8-ին, խորհրդարանում ընդունված զեկույցում, հաղորդում է Araratnews.am-ը։
Զեկույցն ընդունվել է 367 կողմ, 74 դեմ ձայների հարաբերակցությամբ, իսկ 188 պատգամավոր ձեռնպահ է մնացել քվեարկությունից։ «Ներկայիս պայմաններում, չնայած թուրքական հասարակության զգալի մասի ժողովրդավարական և եվրոպամետ ձգտումներին, Թուրքիայի ԵՄ-ին անդամակցության գործընթացը չի կարող վերսկսվել», - նշել են Եվրախորհրդարանի պատգամավորները։
Նրանք խոր մտահոգություն են հայտնել Թուրքիայում ժողովրդավարական չափանիշների հետագա վատթարացման և «քննադատական ձայների անողոք ճնշումների» վերաբերյալ։
Նրանք դատապարտել են վերջին խաղաղ զանգվածային բողոքի ցույցերի դաժան ճնշումը և հարյուրավոր ցուցարարների նկատմամբ զանգվածային դատավարությունները՝ առանց քրեական հանցագործության որևէ ապացույցի։
Եվրախորհրդարանի պատգամավորները Ստամբուլի քաղաքապետ Էքրեմ Իմամօղլուի դեմ հարուցված քրեական հետապնդումը նույնպես համարում են քաղաքական դրդապատճառներով պայմանավորված, որի նպատակն է կանխել օրինական մրցակցի մասնակցությունը առաջիկա ընտրություններին։