Բաժանորդագրվեք araratnews-ի  տելեգրամ ալիքին։

Աշխարհի ակումբային առաջնության մեկնարկում Չեմպիոնների լիգայի գործող գավաթակիր ՊՍԺ-ն մրցել է Մադրիդի «Ատլետիկոյի» հետ և 4 անպատասխան գնդակ է ուղարկել մրցակցի դարպասը։ Հանդիպումը կայացել է Փասադենայի «Ռոուզ Բոուլ» մարզադաշտում։

Հանդիպման հաշիվը 19-րդ րոպեին բացել է Ֆաբիան Ռուիսը։

Առաջին կեսին ավելացված առաջին րոպեին Վիտինյան խփել է փարիզցիների երկրորդ գոլը։

87-րդ րոպեին Սենին Մայուլուն հաշիվը դարձրել է խոշոր։ Հիմնական ժամանակին ավելացված 7-րդ րոպեին էլ ՊՍԺ-ի հարավկորեացի կիսապաշպան Լի Կանգ Ինն անվրեպ է իրացրել 11-մետրանոցն ու ձևակերպել է հանդիպման վերջնահաշիվը՝ 4։0։

Նշենք նաև՝ 58-րդ րոպեին Խուլիան Ալվարեսը կրճատել է հաշվի տարբերությունը, սակայն դրանից առաջ Կոկեն խախտել էր կանոնները Դեսիրե Դուայիի հետ պայքարում։ VAR-ի օգնությամբ վերանայումից հետո գոլը չի արձանագրվել։ 77-րդ րոպեից էլ մադրիդցիները խաղացել են 10 հոգով, երբ Կլեման Լանգլեն, երկու դեղին քարտ ստանալով, հեռացվել է խաղադաշտից։

ՖԻՖԱ-ի աշխարհի ակումբային առաջնությունն անցկացվում է 2025 թվականի հունիսի 15-ից մինչև հուլիսի 13-ը Միացյալ Նահանգներում։ Մրցաշարին մասնակցում են 32 ակումբներ, թիմերը բաժանված են չորս թիմից բաղկացած ութ խմբերի։ Յուրաքանչյուր քառյակի երկու ուժեղագույն թիմերը կշարունակեն իրենց ելույթները փլեյ-օֆֆ փուլում։