Բաժանորդագրվեք araratnews-ի տելեգրամ ալիքին։
Հանրապետության նախագահ Վահագն Խաչատուրյանը նախագահական նստավայրում ընդունել է Ազգային ժողովի «Ամառային դպրոց» 4-րդ ծրագրի մասնակիցներին։
Նախագահը ողջունել է երիտասարդներին՝ ընդգծելով, որ նման ծրագրերը կարևոր հարթակ են պետականության հիմնարար արժեքները խորությամբ հասկանալու և նոր սերնդի գիտելիքները բազմակողմանիորեն զարգացնելու համար։
Իր խոսքում Հանրապետության նախագահը խոսել է պետական անկախության, ինքնիշխանության, ազատության և ժողովրդավարության գաղափարների մասին՝ առանձնացնելով դրանց դերը մեր հասարակական և քաղաքական կյանքի կազմակերպման մեջ։ Նա շեշտել է, որ այդ արժեքները ոչ միայն պատմական ճանապարհի արդյունք են, այլև մեր ապագայի ձևավորման հենասյուներ։
Բանախոսության ավարտին նախագահը զրույց է ունեցել Ամառային դպրոցի մասնակիցների հետ՝ պատասխանելով նրանց հետաքրքրող հարցերին, որոնք վերաբերում էին երկրի ներքին զարգացումներին, արտաքին քաղաքական առաջնահերթություններին և հասարակական կյանքի տարբեր ոլորտներին։ Երիտասարդները հնարավորություն են ունեցել ոչ միայն ստանալ իրենց հուզող հարցերի պատասխանները, այլև լսել նախագահի դիտարկումները։