Բաժանորդագրվեք araratnews-ի տելեգրամ ալիքին։
Այս շաբաթ ինդոնեզական Բալի կղզու առողջարանային քաղաքում ջրհեղեղի հետևանքով զոհվել է առնվազն վեց մարդ, իսկ մայրաքաղաքի հիմնական ճանապարհները փակվել են՝ խաթարելով զբոսաշրջային ակտիվ ուղղության աշխատանքը, հայտնում է Reuters-ը։
Երեքշաբթի երեկոյից մինչև չորեքշաբթի առավոտ տեղացած անդադար հորդառատ անձրևների հետևանքով Բալիի մայրաքաղաք Դենպասարում երկու շենք է փլուզվել, ինչի հետևանքով զոհվել է չորս մարդ։ Այս մասին հայտնել է կղզու որոնողափրկարարական գործակալության ղեկավար Նյոման Սիդակարիան։
Ջեմբրանա շրջանում ևս երկու մարդ է զոհվել, իսկ 85-ը՝ տարհանվել։ Այս մասին չորեքշաբթի օրը հայտնել է Ինդոնեզիայի բնական աղետների հետևանքների մեղմացման գործակալությունը։ Չորեքշաբթի օրվա դրությամբ՝ Բալիում ջրհեղեղը շարունակվում է։ Այս մասին լրագրողներին հայտնել է գործակալության ղեկավար Սուհարյանտոն։
Նյոմանի խոսքով՝ Դենպասարի մոտ գտնվող կղզու միջազգային օդանավակայանի մուտքը սահմանափակված է եղել, քանի որ ճանապարհներով կարող էին երթևեկել միայն բեռնատարները։
Սոցիալական ցանցերում տեղադրված տեսանյութերը, որոնք Reuters-ը չի կարողացել ստուգել, ցույց են տվել գլխավոր ճանապարհներին ջրհեղեղի հետևանքով առաջացած խցանումները։
Նյոմանի խոսքով՝ դեպքի վայր է ուղարկվել մոտ 200 փրկարար։ Հորդառատ անձրևները ջրհեղեղ են առաջացրել նաև Ինդոնեզիայի արևելքում՝ Նուսա Տենգարայում, որտեղ չորս մարդ է մահացել, հայտնել են բնական աղետների հետևանքների մեղմացման գործակալությունից։