Բաժանորդագրվեք araratnews-ի տելեգրամ ալիքին։
Ազգային ժողովում 2027 թվականի բյուջեի նախագիծը ներկայացնելիս վարչապետ Նիկոլ Փաշինյանն անդրադարձավ ևս մեկ նորամուծության, որը, ըստ նրա, պետբյուջեի համար ունի կարևոր նշանակություն։
Նրա խոսքով՝ երկար ժամանակ տարբեր քննարկումներից և օրենսդրական փոփոխություններից հետո 2027 թվականի փետրվարից նախատեսվում է խաղային գործունեության նկատմամբ վերահսկողություն իրականացնող կամ, ավելի ճիշտ՝ խաղային գործունեությունը թափանցիկ դարձնող օպերատորի գործունեությունը։
«Այսինքն՝ սա մի համակարգ է, որի համար տեսանելի են լինելու Հայաստանում կատարված բոլոր խաղադրույքները, ստացված շահումները, և նաև դրանից բխող հարկային հավաքագրումներն ավելի թափանցիկ կլինեն։ Նաև ուզում եմ ասել, որ որոշակի քաղաքականություններ մշակված կլինեն, և նոր քաղաքականություններ մշակելու հնարավորություն կլինի, որովհետև կլինեն մարդիկ, որոնք սեփական դիմումի համաձայն (չնայած այսօր էլ այդ համակարգը կա) կամ այլ ձևերով, ինչպես նաև որոշակի զբաղմունքի տեր մարդիկ ուղղակի կարգելափակվեն և հնարավորություն չեն ունենա շահումով խաղերով զբաղվելու, համենայնդեպս՝ առցանց համակարգում»,- նշեց նա։
Վարչապետը հիշեցրեց, որ այս թեմայով վերջին տարիներին բազմաթիվ նախաձեռնություններ են եղել, և օրենքներ են ընդունվել, խստացումներ են իրականացվել, բայց պետք է առերեսվել մեկ այլ մարտահրավերի․ երբ Հայաստանում նման գործունեությանը կամ գործողություններին հասանելիությունը սահմանափակվում է, տեսնում ենք միտումներ, որ Հայաստանի քաղաքացիները գտնում են ձևեր և արդեն խաղադրույքներ են կատարում Հայաստանից դուրս։