Նախորդ շաբաթ ֆեյսբուքում գրառում էր տեղադրվել, որտեղ կար բողոք մեր վարորդներից մեկի ոչ հարիր պահվածքի մասին: Այս մասին այսօր՝ մայիսի 2-ին, Երեւանի քաղաքապետարանում հերթական խորհրդակցության ժամանակ նշեց քաղաքապետի պաշտոնակատար Լեւոն Հովհաննիսյանը:
«Գրառման մեջ ասվում էր, որ վարորդը ագրեսիվ է իրեն պահել վարելու ընթացքում, ծխել է, մնացորդը դուրս է նետել եւ նաեւ ուղեւորներին պարբերաբար հորդորել է, որ մանրադրամը փոխանցեն իրեն»,- ասաց նա:
Իր հերթին «Երեւանի ավտոբուս» ԲԲԸ տնօրենը նշեց, որ բոլոր ավտոբուսներում տեղադրված են տեսախցիկներ, եւ իրենք դիտել են տվյալ տեսանյութը. «Հաստատվեց, որ վարորդն իրեն շատ վատ է պահել, թույլ չի տվել դրամը գցեն արկղի մեջ, ասել է՝ տվեք ինձ: Այո, ծխել է եւ ծխախոտը դուրս է նետել: Այդ վարորդը հեռացվել է աշխատանքից: Մենք ամենօրյա ռեժիմով վարորդներին հորդորել ենք, որ ղեկին չեն ծխելու, բոլորը լինելու են սափրված, մաքուր, ավտբուսները լինելու են մաքուր: Եթե կլինեն վարորդներ, որ շարունակում են ծխել, կհեռացվեն աշխատանքից:
Ես քաղաքացիներին ուզում եմ խնդրել, որ ավտոբուս բարձրանալիս ունենան 100-դրամանոց եւ գցեն արկղը, չտան վարորդին»,- ասաց նա:
Քաղաքապետի պաշտոնակատարը խնդրեց այդ տեսանյութը փոխանցել քաղաքապետարանի լրատվական վարչությանը, որպեսզի, եթե հարկ կլինի, սոցիալական բնույթի հոլովակ նկարահանեն այս պատմության շուրջ: