Բաժանորդագրվեք araratnews-ի տելեգրամ ալիքին։
YouTube-ի նախկին գլխավոր տնօրեն եւ Google-ի բազմամյա ղեկավար Սյուզան Վոյցիցկին շաբաթ օրը վախճանվել է 56 տարեկան հասակում, թոքերի քաղցկեղի դեմ երկամյա պայքարից հետո։
«Խոր թախիծով տեղեկացնում եմ Սյուզան Վոյցիցկու վախճանման մասին։ 26 տարվա իմ սիրելի կինը եւ մեր հինգ երեխաների մայրը լքեց մեզ այսօր թոքերի քաղցկեղի դեմ պայքարի երկու տարիներից հետո»,- գրել է Վոյցիցկու ամուսինը՝ Դենիս Թրոպերը, Ֆեյսբուքի իր հաղորդման մեջ։
Տեխնոլոգիաների ոլորտում ամենահայտնի կանանցից մեկը Google է եկել 1999թ. եւ դարձել տեխնոլոգիական հսկայի առաջին աշխատակիցներից մեկը, մինչ ընկերությունը ձեռք կբերեր YouTube-ը։ Google-ը YouTube-ը գնել է 2006թ. 1,65 մլրդ դոլարով։
2014թ. YouTube-ի գլխավոր տնօրեն դառնալուց առաջ Վոյցիցկին Google-ի գովազդային արտադրանքի գծով ավագ փոխնախագահն էր։
Աշխատանքի ինը տարիներից հետո Վոյցիցկին 2023թ. հեռացել է YouTube-ում զբաղեցրած պաշտոնից, որպեսզի կենտրոնանա «ընտանիքի, առողջության եւ անձնական նախագծերի վրա»։ Նրան փոխարինել է տեղակալ Նիլ Մոհանը, որը գովազդի գծով ավագ մենեջերն էր եւ Google է եկել 2008թ.։