Սահմանում չկրակելու հրաման որևէ պաշտոնատար անձի կողմից չի տրվել։ Այս մասին ԱԺ պաշտպանության և անվտանգության հարցերի մշտական հանձնաժողովի նիստում ասաց պաշտպանության փոխնախարար Արման Սարգսյանը։ «Միայն կարող եմ պնդել, որ չկրակելու հրաման որևէ պաշտոնատար անձի կողմից չի տրվել վստահաբար», ասաց նա՝ անդրադառնալով այն հարցին, թե ՀՀ զինծառայողներին չկրակելու հրաման տրվա՞ծ է։
Պատգամավոր Գեղամ Մանուկյանը նկատեց, որ սահմանում հայ և ադրբեջանցի զինծառայողները երբեմն փայտերով են իրար ծեծել, ոչ թե կրակոց են արձակել։ Ի պատասխան փոխնախարարն ասաց․ «Ինչ վերաբերում է ծեծկռտուքներին, ապա դրանք իրավիճակից բխող հենց զինվորականների՝ այդ պահի թելադրանքով իրականացվող այսպիսի գործողություններ են։ Ուսումնասիրություններ այդ առումով իրականացվում են, թե ծառայողական քննության, թե ընդհանրապես քննության առարկա կդառնան մայիսի ընթացքում տեղի ունեցած իրադարձությունները»։