Եվրոպայի խորհրդի Մարդու իրավունքների հանձնակատար Դունյա Միյատովիչը նորից կոչ է արել վերականգնել ազատ տեղաշարժը Լաչինի միջանցքով և ապահովել մարդասիրական օգնության արագ և անխոչընդոտ տեղափոխումը Լեռնային Ղարաբաղում:

Այս մասին գրում է 1lurer-ը՝ հղում անելով Եվրոպայի խորհրդի Մարդու իրավունքների հանձնակատարի հրապարակած հայտարարությանը:

«Ես շարունակում եմ լրջորեն մտահոգված մնալ Լեռնային Ղարաբաղում հումանիտար իրավիճակի և նրա բնակչության մարդու իրավունքների կապակցությամբ՝ 2022 թվականի դեկտեմբերից Լաչինի միջանցքով անցնող ճանապարհի արգելափակումից հետո։ Ես վերահաստատում եմ այդ ճանապարհով ազատ տեղաշարժը վերականգնելու իմ նախորդ կոչը»,- նշված է Եվրոպայի խորհրդի Մարդու իրավունքների հանձնակատարի հրապարակած հայտարարության մեջ։

Նրա խոսքով՝ իր և բազմաթիվ այլ միջազգային շահագրգիռ կողմերի կոչերին՝ տարածաշրջանում հումանիտար և մարդու իրավունքների հետ կապված իրավիճակն էլ ավելի է վատթարացել, հատկապես ազդելով առավել խոցելի խմբերի վրա՝ մարդկանց տեղաշարժի, սննդի մատակարարումների և շտապ բժշկական օգնության երկարատև խափանումների պատճառով:

«Կարմիր խաչի միջազգային կոմիտեն (ԿԽՄԿ), որն այս պահին միակ միջազգային մարդասիրական կազմակերպությունն է, որը գործում է Լաչինի միջանցքում, նշել է, որ բնակչությունը բախվել է կյանքեր փրկող դեղամիջոցների և առաջին անհրաժեշտության պարագաների պակասի խնդրի հետ:

Համապատասխան շահագրգիռ կողմերը պետք է անհապաղ լուծում գտնեն, որպեսզի խուսափեն տեղի բնակչության առջև ծառացած շատ վտանգավոր իրավիճակի հետագա վատթարացումից և երաշխավորեն անվտանգ ու ազատ անցում նրանց համար, ովքեր մարդասիրական օգնություն են տրամադրում և ապահովում են մարդու իրավունքների պաշտպանություն: Ինչպես նշված է 2021 թվականի իմ հուշագրում, Հայաստանն ու Ադրբեջանը պետք է ջանքեր գործադրեն հաշտեցման ճանապարհով առաջ շարժվելու և բոլոր մարդկանց համար կայուն խաղաղություն ապահովելու ուղղությամբ։

Ես վերահաստատում եմ իմ հանձնառությունն ու պատրաստակամությունը՝ փոխգործակցելու բոլոր համապատասխան կողմերի հետ և մեկնելու Լեռնային Ղարաբաղ՝ օգնելու հաղթահարել մարդու իրավունքների ոլորտում առկա մարտահրավերները»,- ասել է Միյատովիչը:

424