Բաժանորդագրվեք araratnews-ի տելեգրամ ալիքին։
Սեպտեմբերի 2-ի դրությամբ Լեռնային Ղարաբաղից բռնի տեղահանված մեր հայրենակիցներից ավելի քան 16,000-ը ստացել է Հայաստանի քաղաքացիություն։ Այս մասին Ազգային ժողովի պաշտպանության և անվտանգության հարցերի մշտական հանձնաժողովի նիստում ասաց ՆԳ փոխնախարար Արման Ղազարյանը։
Նրա խոսքով՝ այս պահին կա 11,259 անձ, որոնք ՀՀ նախագահի հրամանագրով ստացել են քաղաքացիություն, ինչպես նաև ավելի քան 5,000 անչափահաս, որոնք ծնողների քաղաքացիություն ստանալուց հետո իրենք էլ են ձեռք բերել ՀՀ քաղաքացիություն։
Ղազարյանը նշեց, որ գործընթացը փորձ է արվում առավել դյուրին և արագ դարձնել: «Եթե նախկինում քաղաքացիության դիմումները քննվում էին կենտրոնացված համակարգով, ապա այժմ մարզային բոլոր ստորաբաժանումներն արդեն ընդունում են ԼՂ-ից տեղահանված անձանց դիմումները: Երևանում բացվել է երկրորդ ընդունման կետը, և ծրագրվում է դրանք ավելացնել, գործարկվել է շրջիկ ծառայություն, որը մեկ օրում հավաքագրում և ներկայացնում է շուրջ 50 դիմում»,- ասաց նա:
Փոխնախարարի խոսքով՝ ԼՂ-ից բռնի տեղահանված անձինք քաղաքացիությունը ստանում են ստանդարտ ընթացակարգերի համեմատ գրեթե կիսով չափ ավելի արագ ժամկետներում: