ՀՀ ԱԺ պետական-իրավական հարցերի մշտական հանձնաժողովի օգոստոսի 27-ի արտահերթ նիստում ՀՀ կենտրոնական ընտրական հանձնաժողովի գործունեության մասին հաղորդում ներկայացրեց ԿԸՀ նախագահ Տիգրան Մուկուչյանը:

Հաղորդումը կազմվել է համապատասխան բաժիններից, որոնցում ընդգրկված է ամբողջական տեղեկատվություն 2021 թվականի հունիսի 20-ին  տեղի ունեցած խորհրդարանական արտահերթ ընտրությունների վերաբերյալ:

ԿԸՀ նախագահի դիտարկմամբ՝ 2021-ի հունիսի 20-ի արտահերթ ընտրություններն ունեին որոշակի առանձնահատկություններ, առկա էին մի շարք գործառույթներ: Առաջին անգամ էր, որ համավարակի պայմաններում պետք է իրականացվեին ընտրություններ:

Ըստ Մուկուչյանի՝ տեղի ունեցած փոփոխություններով պայմանավորված՝ ծավալուն աշխատանք է կատարվել, եւ ժամկետների խախտումներ չեն արձանագրվել:

Համաձայն հաղորդման՝ խորհրդարանական արտահերթ ընտրությունների ժամանակ դիտորդական առաքելություն են իրականացրել 8 միջազգային եւ օտարերկրյա կազմակերպությունների 483, ինչպես նաեւ 19 տեղական հասարակական կազմակերպությունների 8749 դիտորդներ, տեղական 68 զանգվածային լրատվամիջոցների 745 եւ 50 օտարերկրյա զանգվածային լրատվամիջոցների 135 ներկայացուցիչներ:

Տիգրան Մուկուչյանը պատասխանեց հանձնաժողովականների հարցերին:

«Ազգային ժողովի կանոնակարգ» սահմանադրական օրենքի 100-րդ հոդվածի 3-րդ մասի համաձայն՝ ԱԺ «Հայաստան» խմբակցության հեղինակած ««ՀՀ ութերորդ գումարման ԱԺ մշտական հանձնաժողովներ ստեղծելու մասին» ԱԺ որոշման մեջ փոփոխություն կատարելու մասին» նախագծի քննարկումը հետաձգվեց մինչեւ երկամսյա ժամկետով: 

332